2026 ވަނަ އަހަރުގެ ސްޓާފް ނައިޓް ކުލަގަދަކޮށް ބާއްވައިފި
ކެޓަގަރީ: ޚަބަރު - 2026-10-29
މި ސްކޫލުގެ މުވައްޒަފުން ކުރަމުންދާ ބުރަ މަސައްކަތްތައް ފާހަގަކޮށް، އެމުވައްޒަފުންގެ އަގުވަޒަންކުރުމުގެ ގޮތުން 2026 ވަނަ އަހަރުގެ "ސްޓާފް ނައިޓް" ކުލަގަދަކޮށް ފާހަގަކޮށްފިއެވެ. މި ޚާއްޞަ ހަފުލާ ކުރިއަށް ގެންގޮސްފައިވަނީ 2026 އޮކްޓޫބަރު 22 ވީ ބުރާސްފަތި ދުވަހުގެ ރޭ 20:30 ގައެވެ.
މިފަދަ އުފާވެރި މާހައުލެއްގައި މި ހަފުލާ ބޭއްވުމުގެ މައިގަނޑު މަޤުޞަދުތަކުގެ ތެރޭގައި، ސްކޫލުގެ ކުރިއެރުމަށާއި، ތަރައްޤީއަށް މުވައްޒަފުން ވަމުންދާ ޤުރުބާނީތަކާއި، ކުރަމުންދާ އަގުހުރި މަސައްކަތްތައް ފާހަގަކޮށް، އިޚްލާޞްތެރިކަމާއެކު ޝުކުރު އަދާކުރުން ހިމެނެއެވެ. މީގެއިތުރުން، އޮފީހުގެ ރަސްމީ މާހައުލުން ބޭރުގައި މުވައްޒަފުންނަށް ހިތްހަމަޖައްސާލުމުގެ ފުރުޞަތު ތަނަވަސްކޮށްދިނުމާއި، އެކަކު އަނެކަކާ ގާތުން ބައްދަލުވެ ވާހަކަދައްކާލުމުގެ މަގު ފަހިކޮށްދިނުމަކީވެސް މުހިންމު އަމާޒެކެވެ. ހަމައެއާއެކު، މުޅި ޓީމުގެ އެކުވެރިކަމާއި އެއްބައިވަންތަކަން އިތުރަށް ބަދަހިކޮށް، ގުޅުން ހަރުދަނާކުރުމަށް މި ހަފުލާގެ ސަބަބުން ބޮޑު ބާރަކަށް ވެގެންދިޔައެވެ.
މި ރަސްމިއްޔާތުގައި، ފާއިތުވި ދުވަސްތަކުގައި މުވައްޒަފުންގެ ފަރާތުން ސްކޫލަށް ލިބިގެންދިޔަ މިންނެތް އެއްބާރުލުމަށާއި، ތަޢުލީމީ އަދި އިދާރީ ހިންގުން ހަރުދަނާކުރުމަށް ކޮށްދެއްވި ބުރަ މަސައްކަތްތަކަށް މެނޭޖްމަންޓުގެ ފަރާތުން ވަނީ ޚާއްޞަ ޝުކުރެއް އަދާކޮށްފައެވެ.
ސްކޫލަށް ދިގު މުއްދަތަކަށް ޚިދުމަތްކޮށްދެއްވާފައިވާ މުވައްޒަފުންގެ އިޚްލާޞްތެރި ޚިދުމަތް ފާހަގަކުރުމުގެ ގޮތުން މި ހަފުލާގައި ވަނީ ޚާއްޞަ ހަނދާނީ ފިލާތަކެއް އަރުވާފައިވެއެވެ. އެގޮތުން ދިގު މުއްދަތުގެ ޚިދުމަތް ފާހަގަކޮށް، ޖުމްލަ 39 މުވައްޒަފަކަށް އެވޯޑު އަރުވާފައެވެ:
-
5 އަހަރުގެ ޚިދުމަތް: ސްކޫލަށް 5 އަހަރު ދުވަހު ޚިދުމަތް ކުރެއްވި މުވައްޒަފުންނަށް ހަނދާނީ ފިލާ ދިނުން
-
10 އަހަރުގެ ޚިދުމަތް: ސްކޫލަށް 10 އަހަރު ދުވަހު ޚިދުމަތް ކުރެއްވި މުވައްޒަފުންނަށް ހަނދާނީ ފިލާ ދިނުން
-
15 އަހަރުގެ ޚިދުމަތް: ސްކޫލަށް 15 އަހަރު ދުވަހު ޚިދުމަތް ކުރެއްވި މުވައްޒަފުންނަށް ހަނދާނީ ފިލާ ދިނުން
-
20 އަހަރުގެ ޚިދުމަތް: ސްކޫލަށް 20 އަހަރު ދުވަހު ޚިދުމަތް ކުރެއްވި މުވައްޒަފުންނަށް ހަނދާނީ ފިލާ ދިނުން
-
25 އަހަރުގެ ޚިދުމަތް: ސްކޫލަށް 25 އަހަރު ދުވަހު އަގުހުރި ޚިދުމަތް ކުރެއްވި މުވައްޒަފުންނަށް ހަނދާނީ ފިލާ ދިނުން
މުވައްޒަފުންގެ ފަރުވާތެރިކަމާއި ވަޒީފާއަށް ދޭ އަހައްމިއްޔަތު ފާހަގަކުރުމުގެ ގޮތުން، ދިރާސީ އަހަރުގެ ރަސްމީ ދުވަސްތަކުގައި އެންމެ ރަނގަޅު ހާޒިރީއެއް ދެއްކި މުވައްޒަފުންނަށް ވަނީ ދެ ގިންތިއަކުން އެވޯޑު ދީފައެވެ. މިގޮތުން ޖުމްލަ 31 މުވައްޒަފަކަށް ވަނީ ހާޒިރީގެ ޚާއްޞަ ހަނދާނީ ފިލާ އަރުވާފައެވެ.
-
އަޝްރަފީ އެވޯޑު: މިއީ ދިރާސީ އަހަރުގެ ރަސްމީ މަސައްކަތު ދުވަސްތަކުގެ ޖުމްލައިން 95 އިންސައްތައަށް ވުރެ މަތިން ހާޒިރުވެފައިވާ މުވައްޒަފުންނަށް ދެވުނު އެވޯޑެކެވެ.
-
ލާލު އެވޯޑު: މިއީ ދިރާސީ އަހަރުގެ ރަސްމީ މަސައްކަތު ދުވަސްތަކުގެ ޖުމްލައިން 90 އިންސައްތައަށް ވުރެ މަތިން ހާޒިރުވެފައިވާ މުވައްޒަފުންނަށް ދެވުނު އެވޯޑެކެވެ.
މި ހަފުލާ ނިމިގެންދިޔައީ މުވައްޒަފުންގެ މެދުގައި އޮތް ގާތްކަމާއި އެކުވެރިކަން ދައްކުވައިދޭ ހިތްގައިމު ވަގުތުކޮޅުތަކަކަށް ފަހު، ކުރިއަށް އޮތް އަހަރުތަކުގައިވެސް ސްކޫލުގެ ކާމިޔާބީއާއި ކުރިއެރުމަށް އެންމެހައި މުވައްޒަފުން ގުޅިގެން މަސައްކަތްކުރުމުގެ ޢަޒުމާ އެކުގައެވެ.